Ika-walong Liham

Ama, Patawad

Alam kong ilang beses mo nang narinig ang binibigkas ngayon ng bibig
Ilang beses nang nangako ng mga pangakong pauli-ulit na napapako
Mga luhang tumutulo habang sa'yo ay nagsusumamo
Hindi na mabilang sa kanan at kaliwang kamay
Sumula nang nagawa at nagagawa ang mga bagay-bagay
Mga bagay na sa'yo ay madalas na nagpapalumbay
Dahil sa aking pagiging pasaway
Pinipilit sa iyo ang mga bagay na noon pa ay dapat nang tinapos
Na ngayon sa akin ay unti-unting gumagapos
Naalala pa noong ikaw ay unang tinanggap at nakilala
Paggising, maging sa pagsapit ng gabi ay pasasalamat sa'yo ang sambit
Sa isip ay ikaw lamang ang naaalala
Ikaw ang laman ng bawat kanta
Lumalaban sa tawag ng laman, dahil sa puso ikaw ang laman
Ang presensiya mo ay aking ramdam
Ikaw lamang ang nais papurihan
Ang huling araw ng linggo ay laging alay sa'yo
Masaya, buong galak na nagsisilbi sa'yo
Ngunit parang kapeng mainit ay biglang nanlamig
Mula nang sa isang nilalang ay umibig
Ngayon ay hindi na masabi sa'yo ang mga salitang "Mahal Kita"
Dahil iba na ang mas pinagtutuunan
Patawad Ama sa pagiging mahina
Nagpadala sa lumbay at lumang alaala
Kahit ngayon pa man na tapos na ay naiwang tulala
Hindi ko alam kong paano ba muling magsisimula
Hindi alam kong itutuloy ba ang naiwan o babalik muli sa umpisa
Alam kong maraming paraan ngunit alam kong nasaiyo ang kasiguruhan
Patawad dahil pinili pa rin magbakasakali
Ngunit alam kong sa iyo babalik nang paulit-ulit
Ama ako ay tinatanggap mo nang paulit-ulit
Sa ngayon ay panandalian munang lilipad
Sa pamilya, sa bubong na masasabi kong tahanan
Sa lugar na pinanggalingan
Dala ang panalangin na sana sa aking pagbalik ay naghilom na ang mga sugat
Babalik dahil ikaw lamang ang aking huling hantungan
Kaya Ama, muli ay Patawad at Salamat.

Ika-pitong Liham

Sana

Sana noong una pa lang, hindi na tumabi sayo sa klase
Para hindi tayo nagkausap at nagkakilanlan.
Sana noong umpisa pa lang ay hindi ka na sumama sa grupo ng tropa
Para hindi kita halos araw-araw nakakasama.
Sana noong umpisa pa lang na nag-text ka ay hindi na nag-abala
Hindi na sana ako nagmadali pang pumunta kila Aling Nena
Para magpa-load, para reply-an ka.
Sana ay hindi ko na pinakinggan at inaral pa ang mga paborito mong kanta
Na sabay nating kinakanta t'wing tayo ay magkasama.
Sana ay hindi ko na lang inalam ang paborito mong ulam
Para hindi kita naalala t'wing iyon ang nakahain sa mesa
Sana ay hindi na lang sumama nang inaya mong manood ng inaabangan mong pelikula
Para hanggang ngayon hindi kita naaalala, kasi series pala
Yung pang-apat, ipapalabas na
Sana hindi na lang sumabay sayo mag-aral sa silid-aklatan
Kasi iba naman ang natutunan
Habang bumibilis ang tibok ng puso t'wing nagkakatinginan.
Sana hindi ka na lang inaya pang umakyat sa mataas na bahagi ng paaralan
Para pagmasdan ang mga bituwin at buwan
Para hindi kita naalala t'wing titingala sa kalangitan
Sana hindi ka hinayaang sumandal sa mga balikat ko
Noong sinabi mong masakit ang ulo mo.
Sana hindi ka na lang sumama noon sa Baguio

Para hindi nahawakan ang mga kamay mo

Noong sinabi mong "Nilalamig ako"

Sana hindi ka na lang niyakap noong nanginginig ka

Para hindi ko na naramdaman, na sa'yo ay nahuhulog na pala.

Sana ay hindi na nagtanong kung "Ano ba tayo?"

Para hindi na naging tayo.

Sana ay hindi na lang naging tayo.

Kasi hindi naman pala tayo hanggang dulo.

Sana ay hindi na lang kita sobrang minahal.

Dahil hindi naman pala tayo magtatagal.

Sana ay hindi na lang kita sobrang minahal.

Para hindi na nagmo-move on kahit sobra nang tagal.

Sana hindi ka na lang nakilala, eh di sana ngayon hindi kita naaalala

Sana hindi ka na lang minahal, eh di sana ngayon hindi na nasasaktan

Sana pwdeng balikan at i-rewind ang panahon noong una tayong nagkita

Sa apat na dingding ng silid kung saan unang masilayan ang iyong mga mata

Sa unang araw ng kung kailan tayo nagkakilala

Sana ay hindi na lang pumasok sa eskuwela

Sana hindi na lang nagsalita

Sana hindi ka na lang nakikilala

Sana hindi na nag-abala

Sana hindi na nag-reply pa

Sana hindi na inalam ang paborito mong ulam, kanta at pelikula

Sana hindi na lang sa kilig ay nagpadala

Sana hindi na lang inalam ang nadarama

Sana hindi na lang alam ang salitang "Mahal kita"

Sana ngayon ay hindi inaalam kung paano ba ang limutin ka

 At sana, hindi ngayon gumagawa nitong tula na ikaw na naman ang naaalala.

Ika-anim na Liham

Alaala

Pagbilang ng isa, dalawa, tatlo..

Tatlong taon, tatlong taon na ang lumipas.

Ngunit sa isip ko ay kailan ba lilipas?

Kailan ba lilipas ang mga ala-ala?

Dahil minsan sa madalas pa din kitang naalala.

Sariwa pa din sa isip ko ang iyong tawa

Mga tawang pumupuno sa apat na dingding ng aking kuwarto.

Kuwartong nagiging tila munting mundo, tuwing ikaw ang kapiling ko.

Mga matang panandaliang nagbibigay ng liwanag sa madilim kong mundo.

Mga haplos mong nagpapainit sa malamig na gabi.

Maging ang mga halik na kahit kailan ay 'di na matitikman pang muli

Dahil batid kong di ka na babalik.

Subalit ikaw ay minsan nang bumalik tulad ng nakita sa panaginip

Ngunit hinayaan kang mahagip ng takot at agam-agam ng isip

Oo, isip at hindi na ang puso

Mas mabuti nang ikaw ay mahagip palayo sa halip na aking puso.

Ayaw nang maramdaman ang sakit na dinulot sa kaliwang diddib, nang minsan ikaw ay aking inibig.

Masakit man na minsang maalala ngunit mayroon din palang saya.

Dahil ang mga alaalang ito ang magpapaalala na minsan ay hinamak kong ibigin ka.

Ika-limang Liham

ANINO

Naisip kong parang anino pala ang Diyos

Hindi sa kadahilanang sa madilim na parte ng buhay mo ay hindi siya mahagilap

Ngunit aking napagtanto na hinahayaan ka niyang daanan ang dilim upang magpatuloy ka

Magpatuloy sa buhay hanggang masilayan ang liwanag

Ang liwanag na siya ang may dala

Nais niyang mula sa dilim ay maliwanagan ka

Maliwanagan kung bakit hinayaan ka niyang pagdaanan ang dilim

Dilim na lagi mong tinatanong  kung bakit

Bakit pinapahintulutan niyang mangyari

Bakit niya pinahintulutan kung sinabing niyang mahal ka niya

Pero sa takdang panahon ay mapagtatanto mo

Maiisip mong kung hindi ka dumaan sa dilim

Hindi ka magiging sabik makita ang liwanag

Paglipas ng dilim, masisilayan mo ang liwanag

Sa liwanag makikitang mong hindi ka niya iniwan

Hindi ka niya iniwan sa dilim

Hindi mo lang siya makita dahil napuno ng kadiliman ang buhay mo

Ngayon na nasilayan mo ang liwanag at ang kadiliman ay lumipas na

Ngunit kung muli mang sumapit ang dilim ay hindi ka na matatakot

Hindi ka na mangangamba

Dahil alam mong tulad ng anino

Hindi mo man siya makita sa dilim

Alam mong hindi ka niya iiwan

Lagi kang gagabayan at sasamahan

Sa dilim man o liwanag

Ika-apat na Liham

 ARAW NG MGA PUSO

Madaming mapupusok, alam mo na kung saan patungo 

Nakakalungkot maisip na iba ang kanilang unang naiisip sa tuwing ito ay sasapit 

Di ba'y dapat ang unang naiisip ay iyong sinapit? 

Sa sobrang pagmamahal ng Amang nasa langit, ikaw ay bumaba mula sa langit 

Sa sinasambit ngayon ng isip, marahil sabihing ako ay mapait 

Diyan naman sila magaling, sawa na akong magsinungaling 

Minsan nang umibig ngunit sa huli ay napailing

Pangakong Hindi na uulitin, ikaw ang uunahin 

Ang tamang panahon ay darating din para sa akin 

Ikaw ang unang umibig sa akin, gusto na kitang yakapin 

Pero 'wag niyo muna akong kunin, marami pa po tayong gagawin 

Muli ay salamat Panginoon, salamat sa nangyari noon 

Ako ay bago na ngayon 

Salamat po sa pagmamahal mo, sainyo ay wala akong talo 

Sa pag-ibig ay di masasawi, kung ikaw ang pinili 

Kaya alam kong sainyo hindi ako nagkamali

Mga mali sa buhay ko'y ginawa mong tama muli 

Pag nagmahal muli, alam kong di na mali 

Siguradong ito ay wagi 😂💞

Ikatlong Liham

Panaginip

Maging sa mga oras na ito ay di pa rin matahimik, mula nang magising sa isang panaginip

Puno ng mga tanong ang aking pag-iisip, tulad ng "Isa ba itong babala ng nakaraan, para sa hinaharap?"

Ilang taon na ang lumipas, katulad mo pa rin ba ang hanap?

Alam ng isip na hindi dapat at lalong hindi katanggap-tanggap

Hindi hahayaang diktahang muli ng puso ang isip

Dahil hanggang ngayon ay iniisip-isip bakit ikaw ang aking inibig? 

Kaya itinatak sa isip, hindi na hahayaang madaig pang muli ng puso ang isip

Walong buwan ding nagpakalunod sa iyong mga halik

Tama na, dapat lang na 'di na bumalik

Ngunit minsa'y naiisip, kung hindi ka hinayaang bumitaw

Sana'y di ka naligaw

Ibang-iba na ang iyong galaw, masiyado nang magaslaw

Sabi ng mga kaibigan ay may bago ka na raw

Ngunit nang aking matanaw, ang iyong kaulayaw

Siya ba ang dahilan kung bakit ka bumitaw?

Nakita kung paano ka tinangay, hanggang sa 'di ka na matanaw

Ako ba ang dahilan kung bakit iba na ang iyong kilos at galaw?

Dahil ba ako ay hindi kumapit at hinayaan kang bumitaw? 

Sabi mo sa mga kaibigan natin, ako ay mapait

Dahil ba sa buhay ko'y wala ka pa ring kapalit?

Huwag mong isiping ako sayo ay galit, hindi ako nagmamalupit

Kaya wala ka pang kapalit, ayaw lang maulit ang naramdamang sakit

Sa pagdating ng bagong pag-ibig, papalitan ng tamis ang pait

Sa huli sa iyo ay lalapit, yayakapin ka ng mahigpit

Ibubulong sa iyo ang mga salitang "Salamat sa lahat ng sakit"

Kung mangyari man ang panagip, sasabihing iba na ang hanap

Yung taong hanggang sa huling hininga ako ang hanap

Sa gabing malamig ako ang yakap 

Ikalawang Liham

Wagas

Nais matutong mabigkas ng mga labi ang ayaw ilabas ng pusong nagmamatigas.

Pinipilit maging malakas sa bawat hampas ng mga alon na 'di ko alam kung kailan ba magwawakas.

Hindi namalayang sa paglipas ng mga taon, ang puso ay 'di pala malakas,

Ngunit isa nang matigas.

Ikinukubli sa mga ngiti at tawang wagas ang mga sugat na 'di alam kung kailan maghihilom at lilipas.

Sinubukang ilabas ngunit kasabay nito ay ang pagtangis, mga matang tila nagpapawis.

Diyos Ama, sa iyo ay patuloy na tatangis, hanggang matuyo ang batis.

Alam kong ako ay 'di mo matitiis at 'di na muli pang tatangis.

Sa huli ay ngingiti ng matamis, nananabik sa muli mong pagbabalik.

dailylifeverse.com